ПОСТАПКА ЗА ИДЕНТИФИКАЦИЈА

(Извадоци од Законот за возила (Сл.весник на РМ бр. 140/08) и Правилник за идентификација и  за идентификација и оцена на техничката состојба на возилата Сл. весник на РМ бр. 131/09и 16/10))

„Идентификација” е постапка во која се утврдува истоветноста на возилото и неговите основни технички податоци со помош на приложената документација и/или со проверка на податоците во регистарот на податоци на возила.

Кај правното лице овластено за изведување на постапката за идентификација и/или идентификација и оцена на техничката состојба на возилата се спроведува постапка за идентификација на возилата што првпат се регистрираат во Република Македонија за потребите на:

• меѓународни и меѓудржавни организации – за службено користење;
• дипломатски и конзуларни претставништва на други држави во Република Македонија – за службено користење;
• дипломатски и конзуларни лица вработени во странските претставништва во Република Македонија и членовите на нивните потесни семејства – за приватно користење; (не се однесува за државјани на РМ).
• државјани на Република Македонија кои се враќаат од постојана или привремена работа или престој во странство, доколку биле во странство најмалку една година без прекин;
• странски државјани на кои им е издадено одобрение за привремен или постојан престој во Република Македонија;
• хуманитарни организации за извршување на нивните хуманитарни работи и
• возила кои пред повторното внесување во Република Македонија, еднаш биле регистрирани во Република Македонија.

Постапката на идентификација на возилата се врши само врз основа на приложена документација, без преглед на возилото и без барање за сообразување со други прописи од областа на возилата.

Идентификација на возилото од точки 4 и 5 може да се изврши во рок од една година од постојаното враќање, односно добивање на дозвола за постојано или привремено престојување, ако возилото претходно било во сопственост на барателот најмалку шест месеца пред влегувањето во Република Македонија.

Постапката за идентификација започнува со прием на барањето и проверка на комплетноста на документацијата која ја доставува барателот, а која се состои од:

• Фотокопија од претходната сообраќајна дозвола со оригинал за увид (за возилата што претходно биле регистрирани);
• Фотокопија од потврдата за сообразеност за ЕУ одобрување на возилото – Certificate of conformity, издаден од непосредниот производител на возилото (во понатамошниот текст: СОС) за ново возило со оригинал за увид, односно СОС за половно возило (доколку со таквото возило е издаден), со оригинал за увид или се доставуваат други документи или други докази (посебно ако се работи за возило кое што не е наменето за европскиот пазар или за возило што не е изработено според хармонизираните европски прописи) од кои е можно да се земат валидни податоци за идентификација на возилото кои се потребни за изведување на постапката за идентификација и изготвување на Согласност за регистрација;
• Доказ за исполнување на условите од точките 4) и 5), издаден од органот на државната управа надлежен за вршење на работите од областа на внатрешните работи;
• Доказ за статусот на хуманитарната организација од членот 24 точка 6 од Законот за возила, издаден од надлежен државен орган.
• Потврда за отворање на постапка за идентификација издадена од органот за одобрување со која се потврдува исполнетоста на статусот на барателот согласно одредбите од членот 24 од Законот за возила и
• Доказ за регулирани царински давачки за возилото.